Палітычная актыўнасць духавенства беларускіх парафій Канстанцінопальскага патрыярхата ў 1950–1991 гг.

Анатацыя

Разглядаецца спецыфіка палітычнай актыўнасці духавенства беларускіх парафій Канстанцінопальскага патрыярхата, вакол якіх аб’ядноўвалася значная частка беларускай пасляваеннай дыяспары. Адзначаецца, што прамы ўдзел Беларускай цэнтральнай рады ў фарміраванні праваслаўных абшчын і органаў царкоўнага кіравання ўказанай царкоўнай юрысдыкцыі абумовіў іх уключанасць у дзейнасць палітычнага характару. Беларускія святары ўдзельнічалі ў працы адміністрацыйных падраздзяленняў Беларускай цэнтральнай рады. Пры гэтым клірыкі дапускаліся не толькі да абмеркавання пытанняў царкоўнага характару (пасвячэнне беларускага біскупа, зацвярджэнне кандыдатаў на ўступленне ў клір і г. д.), але і да прыняцця палітычных рашэнняў (правядзенне пленумаў і сесій рады, распрацоўка антысавецкіх рэзалюцый і г. д.). Характэрным напрамкам дзейнасці духавенства названай юрысдыкцыі з’яўлялася падтрымка Беларускай краёвай абароны – антысавецкага парамілітарнага фарміравання Беларускай цэнтральнай рады, створанага ў гады нямецкай акупацыі Беларусі. Важным складнікам падтрымкі святарамі гэтай арганізацыі з’яўлялася прыняцце афіцэрскіх званняў і ўзнагарод. Акрамя таго, беларускія клірыкі рэгулярна ажыццяўлялі рэпрэзентацыю антысавецкай пазіцыі беларускай дыяспары перад вышэйшымі федэральнымі органамі дзяржаўнай улады ЗША, а іменна ўзаемадзейнічали са спецыяльным камітэтам палаты прадстаўнікоў ЗША па камуністычнай агрэсіі і наведвалі кангрэс ЗША з нагоды гадавіны абвяшчэння незалежнасці Беларускай Народнай Рэспублікі. Робіцца выснова аб тым, што выяўленыя напрамкі палітычнай актыўнасці беларускага духавенства канстанцінопальскай юрысдыкцыі сведчаць аб яго палітычнай ангажаванасці і адыходзе ад прынцыпу апалітычнасці ў рэлігійным жыцці.