Навуковая школа расіязнаўства і ўкраіназнаўства ў Беларускім дзяржаўным універсітэце

Анатацыя

Аналізуецца працэс станаўлення і развіцця расіязнаўства і ўкраіназнаўства як навуковай гістарычнай дысцыпліны і навучальнага курса ў БДУ. Адзначаецца, што з 1936/37 вучэбнага года можна дакументальна прасачыць пераемнасць у вывучэнні і выкладанні дысцыпліны на ўзроўні спецыяльных вучэбна-навуковых структур: кафедры гісторыі народаў СССР і гісторыі БССР, кафедры гісторыі народаў СССР, кафедры гісторыі СССР, кафедры гісторыі СССР дасавецкага перыяду, кафедры гісторыі СССР эпохі сацыялізму, кафедры навейшай гісторыі славянскіх краін (на аснове яе была створана кафедра гісторыі паўднёвых і заходніх славян), кафедры расійскай гісторыі (была сфарміравана на базе кафедры гісторыі СССР дасавецкага перыяду, трансфармавалася ў кафедру расійскай і славянскай гісторыі, а затым у сучасную кафедру гісторыі Расіі). Паказваецца ўзаемасувязь развіцця расіязнаўства і ўкраіназнаўства як кірунку гістарычных ведаў і сацыяльна-палітычнай сітуацыі ў краіне. Дэманструецца роля гісторыкаў БДУ ў фарміраванні нацыянальнай структуры гістарычнай памяці, а таксама ў разуменні значнасці гістарычнай навукі для соцыуму і дзяржавы. Характарызуецца нацыянальная беларуская гістарыяграфія як грунтоўны складнік еўрапейскай гістарыяграфіі гісторыі Расіі і Украіны, апісваецца яе інтэграцыя ў агульнаеўрапейскі навуковы працэс вывучэння краін і рэгіёнаў. Разглядаюцца перспектывы беларускага расіязнаўства і ўкраіназнаўства на сучасным этапе, пашырэнне міждысцыплінарнага сінтэзу ў канцы ХХ – пачатку ХХI ст. Зроблена выснова аб ператварэнні расіязнаўства і ўкраіназнаўства ў адзін з вядучых напрамкаў сучаснай гістарычнай навукі, якая ўваходзіць у комплекс сацыяльных і гуманітарных навуковых дысцыплін.